A muraglia di China
Quandu mi ne rientru da a scola
Barattu i quaterni à prò di u ballò
Facciu ancu nice cù quella pistola
Di ghjucà à u banditu in ogni stradò
Ma quandu chì s´affacca un´altra notte
Stanciu tuttu po pigliu a mo ghitarra
Da sottu à un alivu cantu e mo lotte
Duve sunnieghju à una santa sarra
Vulerebbi cantà quandu u sole si chjina
Caminendu à a luce sanghjuvannina
À nant´à a longa Muraglia di China
Quandu i mo amichi si liticanu
Li mengu in capu poi dopu li dicu
Chì hè megliu à stringhje si a manu
Invece di trattà ognunu da nemicu
Ma quandu nunda ùn volenu sente
Eiu cantu sin´à ch´elli piantinu
A canzona chì hè scritta in a celente
Chì ci dice di piglià un altru caminu
Vulerebbi mirà quandu u sole si chjina
L´avvene secretu iscrittu cù una mina
Dentru à e torre di a Muraglia di China
Quandu eiu seraghju più grande o Zì
Mi tuccherà à parte da mare in là
Rimucinendu a brama sbucciata quì
Mi pianteraghju in issa muraglia quallà
Ma quandu m´avvieraghju in issa serpa
À i mo amichi ribelli chjameraghju
Chì dèesse sarrati quallà li sterpa
Vicinu à elli liberi marchjeraghju
Vulerebbi mughjà quandu u sole si chjina
Ch´è a pace trà l´omi ùn hà cunfina
Demu ci a manu à nant´à a Muraglia di China
(marzu di u 2002)